ROETE: Astorga tot Santiago

AFSTAND: 260 km

TYDPERK: 14 aande, 15 dae

DATUMS: 1 tot 15 Oktober 2024

>> Só het ons eerste toergroep gestap

Die moeilikheidsgraad vir elke dag word só aangedui:

4 Camino-skulpies:
_{"Hou bene, hou"}

5 Camino-skulpies:
_{"Hoekom op aarde wou ek dié doen?!"}

KOM ONS STAP!

DAG 1:
Astorga na Rabanal del Camino

Afstand: 20 km

HOOGTEPUNT
Die Episkopaalse paleis, Astorga

Astorga gaan jou voete onder jou uitslaan met sy sjokolade- en pelgrimswinkels, talle straatkafees (wat ook tapas by koffie bedien!) en sy pragtige katedraal.

Iets wat egter uitstaan, is die Episkopaalse paleis wat deur Antoni Gaudí ontwerp is. Die gebou lyk soos ’n kasteel en was bedoel as ’n pastorie en kantoorgebou vir die biskop van Astorga.

Bouwerk het in 1887 begin, maar die biskop én Gaudí is oorlede voordat die projek voltooi is. Die werk is dus eers heelwat later, in die 1960’s, afgehandel. Die paleis is oop vir die publiek en huisves ’n Camino-museum. Die toegangsgeld hiervoor is ingesluit in jou toerprys.

Die eerste stapdag lei jou deur plattelandse gehuggies met keistene, kliphuise en kapelle wat al vir eeue lank pelgrims verwelkom.

Dis ‘n rustige stapdag met ‘n geleidelike opdraand wat jou uiteindelik tot by jou volgende bestemming neem.  

As jy lief is vir fotografie, lees hier:
Die Canon EOS R10 is kompak en die perfekte kamera vir die Camino.

DAG 2:
Rabanal del Camino na El Acebo

Afstand: 16 km

HOOGTEPUNT
Die Cruz de Ferro (die “ysterkruis”), net buite Foncebadón

Vandag se roete neem jou stelselmatig nader aan die berge van die Leon-streek.

Die ysterkruis tussen die dorpe Foncebadón en El Acebo is die hoogste punt van die hele Camino (1 505 meter bo seespieël) en ’n hoogtepunt op die Camino.

Die kruis staan al soveel eeue (moontlik sedert die 11de eeu) daar dat verskeie teorieë oor sy geskiedenis bestaan, soos dat dit oorspronklik deur die Kelte opgerig is.

Pelgrims los ’n klip by die kruis wat vanaf hul tuisland kom as simbool van hul reis tot daar, of as simbool van iets wat hulle in hul lewe wil aflê. Baie versier hul klippe met vlae of die name van geliefdes.

Dag 6:
Las Herrerias na Fonfria

Afstand: 20 km

HOOGTEPUNT
O’ Cebreiro

Die eerste 7 kilometer van vandag se roete is taai. Jy klim sowat 600 m in net 7 km!

Vanoggend steek jy ‘n provinsiale grens oor en betree Galisië, ‘n bergagtige streek wat veral bekend is vir heerlike seekos.

Jy kry die piepklein dorpie, O’ Cebreiro, net anderkant die grens van Galisië en op die spits van die Cebreiro-berg. (Die naam klink sommer na “O Seer Been-ou”!)

Dit is egter een van die dorpe in die streek wat ook baie “gewone” toeriste in toeristebusse lok om die pallozas op die dorp te besigtig – kliprondawels met rietdakke wat byna 1 500 jaar gelede deur die Kelte gebou is.

Afstand: 22 km

HOOGTEPUNT
Die dorp onder water, Portomarin

Die roete is skielik besiger met meer pelgrims en daarmee saam ook meer herberge, geskenkwinkels en koffiewinkels langs die pad. Nietemin is hierdie ‘n mooi deel van Galisië, tipies platteland met mooi ou plaashuise, klipkrale en inheemse woude.

Sowat 25 km buite Sarria steek jy ’n hoë brug oor ’n rivier oor na Portomarín. Die hele dorp is in die 1960’s, toe daar ’n dam gebou is, verskuif na ’n hoërliggende deel, en die kerk is klip vir klip geskuif en herbou.

Wanneer jy op die brug staan, kyk in die water vir die dakke van die ou hoofdorp, wat steeds plek-plek sigbaar is. In baie van die ondernemings op die dorp sal jy foto’s sien van die ou dorp. Neem jou foto by die mooi pelgrimstandbeeld op die plein oorkant die kerk.

Dag 9:
Portomarin na Palas de Rei

Afstand: 24 km

Jy groet Portomarin en volg die roete weswaards deur ‘n digte woud voor jy weer padlangs verder deur die platteland met vele klein dorpies, kerkies, klipkruise en uitkykpunte beweeg.

Dag 10:
Palas de Rei na Melide

Afstand: 14 km

HOOGTEPUNT
Melide

Vandag is ‘n relatief rustige stapdag met ‘n kort afstand, alhoewel die roete in plekke op en af oor heuwels klim. Neem jou tyd deur hierdie gebied en spaar jou bene vir die laaste twee dae wat voorlê.

As jy op die oulike dorp, Melide, kom, is jy omtrent 50 km van die eindpunt af. Melide is veral bekend vir die seekat-dis, pulpo, en twee bekende plekke waar jy dit kan eet, is Pulpería A Garnarcha of Pulpería Ezequiel. Die twee restaurante is baie naby aan mekaar en albei is op die Camino-roete.

Lyk die kerkdeur van die Iglesia de San Pedro, skuins oorkant die pulpo-eetplekke, dalk bekend? Sommige gidsboeke beweer dit is die presiese deur wat op die 10 euro-noot geteken is, maar die locals sê dit het bloot die skets op die geldnoot geïnspireer.

Dag 11:
Melide na Arzua

Afstand: 14 km

HOOGTEPUNT
Die wit kerk op Boente

Het jy pulpo in Melide geproe? Maak seker jy doen dit voor jy die dorp verlaat!

Vandag se roete daal weer verskeie kere met ‘n paar stewige steiltes.

Niemand sal jou kwalik neem as jy die wit kerkie op die piepklein dorp Boente, sowat 45 km voor Santiago de Compostela, miskyk nie, maar die kerk het ’n belangrike rol in die Camino-geskiedenis gespeel.

Tydens die Spaanse Griep van 1918 tot 1920 het die Camino by dié kerk geëindig omdat pelgrims destyds weens die inperkings nie Santiago mag binnegegaan het nie. Word ’n oomblik stil by die gedenkteken vir slagoffers van Covid-19 wat in die kerk se tuin opgerig is.

Dag 12:
Arzua na Amenal

Afstand: 23 km

Van Arzua af kan jy amper-amper die eindpunt van jou Camino op die horison uitmaak. Daar is nog net een oorslaapplek tussen jou en Santiago de Compostela, die spikkel van ‘n dorpie Amenal.

Volg ‘n geleidelike roete deur die laaste stukkie oop platteland voor jy die buitewyke van die stad begin sien.

Vandag sluit pelgrims uit ander Camino-roetes by jou aan vir die finale ent na Santiago.

Afstand: 16 km

HOOGTEPUNT
Die aankoms op Praza do Obradoiro, Santiago de Compostela

Die opwinding is groot, want jy voltooi vandag jou pelgrimstog!

Die staptog het minder natuurskoon as vorige dae hoe nader jy aan die stad beweeg, maar is vol gedenktekens vir die duisende pelgrims wat oor die jare hier gestap het.

Maak ‘n draai by die uitkykpunt by Monte do Gozo waar jy die eerste keer die katedraal in die verte kan uitmaak.

In Santiago volg jy die Camino se geel pyle vir oulaas deur Santiago se pretjiemooi strate tot by die Praza do Obradoiro, die plein voor die Santiago katedraal.

Die aankoms op die plein langs die katedraal op Santiago de Compostela is ’n emosionele ervaring, veral as jy in ’n groep gestap het.

Neem ’n “voetselfie” by die gedenksteen in die middel van die plein, die amptelike eindpunt vir al die Camino-roetes, en kyk om jou heen. Jy sal waarskynlik heelwat gesigte herken omdat jy die pelgrims al langs die pad ontmoet het.

Gooi ’n paar munte in by die musikant wat pelgrims al dekades lank op die plein verwelkom met sy doedelsak, ’n instrument wat in Galisië ontstaan het.

As jy gelukkig is, sal jy die botafumeiro (sien video onder) in die katedraal sien, ’n tradisie waar ’n yslike wierookbak deur agt mans opgehys en deur die lug geslinger word. Die tradisie is dat jy ’n draai by Jakobus se graf maak (onder die katedraal).

Onthou om die beeld van Jakobus (binne die katedraal) ’n drukkie te gee en ’n versoek in sy oor te fluister.

Die katedraal bied ook Engelse toere waar jy op die dak kan staan en sien hoe dit deur die eeue herbou is. Dit bied boonop ’n heerlike uitsig op die plein.

Die stapgids sal jou Compostela namens jou by die pelgrimskantoor gaan haal. Jy hoef dus nie in 'n lang ry hiervoor te gaan staan nie.

Geniet die dorp se heerlike atmosfeer en kuier vir oulaas saam met medepelgrims in die straatkafees.

AS JY NOG TYD HET:
Tot by Finisterre en Muxía
As jy nog verlof en energie het, stap die laaste stuk tot by Finisterre Fisterra, die “einde van die wêreld”, waar jy die son kan sien sak op die krans by die 0 km-baken. Eet van die lekker seekos op die seefront.