Bosasa

ZONDO SE BEVINDINGS

Korrupsie was die sakemodel van Bosasa, het Zondo bevind.

Zuma, saam met minstens een ander lid van die nasionale gesag, amptenare en die voorsitter van ’n staatsentiteit, het volgens getuienis voor die kommissie die Grondwet en wetgewing oortree deur die onwettige toekenning van tenders – dit sluit in Nomvula Mokonyane, Linda Mti, voormalige hoof van die departement van korrektiewe dienste (DKD), en Patrick Gillingham, voormalige finansiële hoof van die DKD.

Bewyse voor die kommissie is dat daar grootskaalse korrupsie was met die toeken van kontrakte en tenders aan Bosasa deur staatsdepartemente, -entiteite en -agentskappe. Dit was oor ’n tydperk van minstens 17 jaar.

Daar is genoegsame bewyse dat Mokonyane gunste gekry het van Bosasa.

Volgens Agrizzi se getuienis het Mokonyane ’n invloed gehad op Zuma en sy was baie magtig in die politiek. Sy het ’n invloed gehad op die nasionale vervolgingsgesag en individue in talle staatsdepartemente.

Agrizzi het geen rede gehad om te lieg oor maandelikse betalings van R50 000 aan Mokonyane nie.

Bosasa het op reuse-skaal lede van die uitvoerende gesag probeer beïnvloed. Dit sluit Mantashe in.

Bosasa het veiligheidstelsels aangebring by drie van Mantashe se eiendomme, twee in die Oos-Kaap en een in Boksburg. Mantashe het nie gedoen wat Bosasa van hom wou hê nie, maar hy moes geweet het dat die maatskappy hom nader met ’n korrupte doel voor oë.

Agrizzi se getuienis voor die kommissie was allesbehalwe perfek en Agrizzi, wat reeds van korrupsie aangekla word, het eerder uit eiebelang as in die openbare belang opgetree.

Dudu Myeni het moontlik die Grondwet en ander wette oortree en het duidelik probeer help dat Bosasa tenders bekom. 

Agrizzi het getuig Watson was openlik daaroor dat hy maandeliks R300 000 kontant aan Myeni betaal het en dat dit bedoel is vir die Jacob G. Zuma-stigting, waarvan Myeni toe die voorsitter was.

Geen bevinding is gemaak oor Bosasa se skenking aan pres. Cyril Ramaphosa se CR17-verkiesingsveldtog om president van die ANC en uiteindelik die land te word nie. Geen bevinding is ook gemaak oor die president se seun Andile Ramaphosa nie, nadat Bosasa R500 000 in sy persoonlike bankrekening inbetaal het voordat dit later na sy pa se verkiesingsfonds oorbetaal is.