Die koningin is dood

Met sewe dekades op die troon, is dit amper ondenkbaar om ’n wêreld sonder die formidabele koningin Elizabeth voor te stel. Hoe raak haar dood Britte én mense wêreldwyd? Arlene Prinsloo vertel meer.

Die meeste mense ken geen ander Britse monarg as koningin Elizabeth nie. Sy was immers langer as sewe dekades op die troon.

Daar word verwag dat derduisende mense langs die roete sal saamdrom waarmee haar kis na die Westministersaal gebring sal word om in staatsie te lê. Nóg duisende sal tou staan om verby haar kis in dié geskiedkundige saal te stap. Ná drie of vier dae in staatsie, sal haar kis vir ’n staatsbegrafnis na die Westminsterabdy gebring word. Honderde Europese koninklikes, politici en leiers van Statebondslande sal die diens bywoon.

Nasionale rou

Die tydperk van nasionale rou in Brittanje sal tussen nege en 12 dae duur. Vlae sal halfstok hang, maar die koninklike vlag, die Royal Standard, sal nie halfstok hang nie omdat koning Charles III se bewind begin het die oomblik toe die koningin gesterf het.

TV- en radiostasies sal huldeblyke aan die koningin uitsaai, terwyl meestal somber musiek op radiostasies gehoor sal word.

Koninklikes word in loodkiste begrawe. Die kis met koningin Elizabeth se lyk sal van die plek van haar dood na die Westminstersaal, deel van die Paleis van Westminster en tans die setel van die Britse regering, geneem word waar dit vir minstens vier dae in staatsie sal lê.

Die kis word op ’n platform wat met purper materiaal oorgetrek is, geplaas. Lede van die Britse gewapende magte sal 23 uur van die dag die kis bewaak en lede van die publiek sal kan tou staan om verby die kis te stap. Die oorblywende uur word gebruik om vars blomme om die kis te sit, kerse te vervang en skoon te maak.

Vier soldate sal vir 20 minute op ’n slag by die kis waak, met twee soldate as reserwes.

’n Vars ruiker sal elke dag op die kis geplaas word. Saam met die blomme sal die regalia van haar bewind – die staatskroon, septer en ryksappel (orb) – ook op die kis geplaas word.

Die nagwaak van die prinse

Die dag voor die begrafnis sal die koningin se kinders by haar kis waak. Prins (nou koning) Charles, prins Andrew, prins Edward en prinses Anne sal met geboë hoofde by elke punt van die kis waak. Van haar kleinkinders en selfs agterkleinkinders kan ook ’n beurt kry om by die kis te waak.

Beplanning, beplanning, beplanning

Planne vir die koningin se dood word reeds sedert die 1960’s gemaak. In 2017 het The Guardian heelwat besonderhede van wat ná die koningin se dood sal gebeur, bekend gemaak.

Die kodewoord vir die koningin se dood was “London Bridge is Down”. Dié kodewoord sou seer sekerlik ná die publikasie in 2017 verander het, maar min van die besonderhede sou verander het aangesien staatsbegrafnisse vir senior koninklikes dieselfde patroon volg, tensy anders versoek. Koningin Victoria het byvoorbeeld versoek om nie in staatsie te lê nie.

Duisende troepe – van die Ghoerkas tot die Grenadier-wagte – sal ná die koningin se dood begin met oefeninge vir die staatsbegrafnis.

Waar het die koningin gesterf?

Omdat die koningin slegs ses maande van die jaar in Londen of Windsor woon, sal haar oorskot óf per trein, óf per vliegtuig vanaf Windsor, Sandringham of Balmoral na Londen gebring word indien sy by een van dié wonings dood is.

Die kis sal eers na die Buckinghampaleis geneem word, vanwaar die kis deur perde van die paleis al met die Mall af na die Westminstersaal geneem sal word.

Die roete